قورئانا پیرۆز › سورەتا ژمارە ١
سورەتا الفاتحة ب تەفسیرا کوردی
Al-Fatiha
بِسۡمِ ٱللَّهِ ٱلرَّحۡمَٰنِ ٱلرَّحِيمِ
تەفسیرا ساناهی — ماموستا تەحسین ئیبراهیم دۆسکی · ژێدەر
بِسۡمِ ٱللَّهِ ٱلرَّحۡمَٰنِ ٱلرَّحِيمِ ﴿١﴾
ب ناڤێ خودێ ئه‌ز خواندنا قورئانێ ده‌ست پێ دكه‌م، وداخوازا هاريكارییێ ژ وى دكه‌م، (ئه‌للاهـ) ناڤێ خودايێ پاك وبلنده، يێ كو په‌رستن بۆ وى ب تنێ دئێته كرن، وئه‌و تايبه‌تترين ناڤه ژ ناڤێن وى، و ژ وى پێڤه‌تر ئه‌و ل سه‌ر كه‌سێ دى نائێته‌دانان. (الرحمن) خودانێ دلۆڤانییا گشتى یا هه‌مى چێكرى ڤه‌گرتين، (الرحيم) يێ دلۆڤانكار ب خودان باوه‌ران، وئه‌ڤ هه‌ردو ناڤه ژ ناڤێن خودێنه، سالۆخه‌تێ دلۆڤانییێ بۆ وى بنه‌جهـ دكه‌ن، ب ڕه‌نگه‌كێ بابه‌تى وى بت.
ٱلۡحَمۡدُ لِلَّهِ رَبِّ ٱلۡعَٰلَمِينَ ﴿٢﴾
مه‌دح بۆ خودێ بن ب سالۆخه‌تێن وى كو هه‌مى سالۆخه‌تێن كه‌مالێنه، و ب قه‌نجییێن وى یێن ئاشكه‌را و ڤه‌شارتى، یێن دینى و دنیایێ. وفه‌رمان د ڤێ چه‌ندێ دا بۆ به‌نییان هه‌یه كو ئه‌و حه‌مدا وى بكه‌ن، ژ به‌ر كو ئه‌و ب تنێ هێژایى وێ چه‌ندێیه، وى چێكرى ئافراندینه، وئه‌و ب كارێ وان ڕادبت، و ب قه‌نجیێن خۆ وان په‌روه‌رده دكه‌ت.
ٱلرَّحۡمَٰنِ ٱلرَّحِيمِ ﴿٣﴾
(الرحمن) خودانێ دلۆڤانییا گشتى یا هه‌مى چێكرى ڤه‌گرتين، (الرحيم) يێ دلۆڤانكار ب خودان باوه‌ران، وئه‌ڤ هه‌ردو ناڤه ژ ناڤێن خودێنه.
مَٰلِكِ يَوۡمِ ٱلدِّينِ ﴿٤﴾
ئه‌و ب تنێ خودانێ ڕۆژا قیامه‌تێیه، ڕۆژا جزادانێ سه‌را كریاران. وخواندنا موسلمانى بۆ ڤێ ئايه‌تێ د هه‌مى ركاعه‌تێن نڤێژێ دا بيرئينانه‌كه بۆ وى ل ڕۆژا دويماهییێ، وپالدانه‌كه بۆ وى ل سه‌ر كرنا كارێ چاك، وخۆدویركرنا ژ گونه‌هـ وخرابییان.
إِيَّاكَ نَعۡبُدُ وَإِيَّاكَ نَسۡتَعِينُ ﴿٥﴾
ئه‌م په‌رستنا ته ب تنێ دكه‌ين، و د هه‌مى كارێن خۆ دا ئه‌م داخوازا هاريكارییێ ژ ته ب تنێ دكه‌ين؛ چونكى كار هه‌مى د ده‌ستێ ته دانه، وكه‌سێ تشته‌ك ژێ د ده‌ست دا نينه. وئه‌ڤ ئايه‌ته ده‌لیله كو چێ نابت عه‌بد تشته‌كى ژ په‌رستنێ بۆ ئێكێ دى ژبلى خودێ پێشكێش بكه‌ت، وه‌كى: دوعایێ، وداخوازا هاریكارییێ، ودانا قوربانان، وطه‌وافێ.. و ده‌رمانێ دلى د ڤێ چه‌ندێ دا هه‌يه كو ژبلى خودێ ئه‌و خۆ ب تشته‌كێ دى ڤه گرێ نه‌ده‌ت، وتووشى ريمه‌تى وخۆمه‌زنكرنێ نه‌بت.
ٱهۡدِنَا ٱلصِّرَٰطَ ٱلۡمُسۡتَقِيمَ ﴿٦﴾
تو به‌رێ مه بده ڕێكا ڕاست، ومه ل سه‌ر موكم بكه هه‌تا ئه‌م دگه‌هينه ته، ڕێكا ڕاست كو ئيسلامه ئه‌و ڕێكا ئاشكه‌را يا مرۆڤى دگه‌هينته ڕازيبوونا خودێ وبه‌حه‌شتا وى، ئه‌وا پێغه‌مبه‌رێ وى يێ دويماهییێ موحه‌ممه‌دى سلاڤ لێ بن به‌رێ مه دايێ؛ چونكى مرۆڤى ڕێیه‌كا دلخۆشییێ نينه ژبلى كو ڕاست به‌رێ خۆ بده‌ته ڤێ ڕێكێ.
صِرَٰطَ ٱلَّذِينَ أَنۡعَمۡتَ عَلَيۡهِمۡ غَيۡرِ ٱلۡمَغۡضُوبِ عَلَيۡهِمۡ وَلَا ٱلضَّآلِّينَ ﴿٧﴾
ڕێكا وان يێن ته قه‌نجى د گه‌ل كرى ژ پێغه‌مبه‌ر وڕاستگۆ وشه‌هيد وچاكان؛ وخودانێن هيدايه‌تێ ئه‌ون، وتو مه نه‌كه ژ وان يێن غه‌زه‌ب لێ هاتییه‌كرن، ئه‌وێن ڕاستى زانى وكار پێ نه‌كرى، كو جوهينه، وهه‌چییێ وه‌كى وان بت، ويێن به‌رزه‌بوويى، ئه‌وێن ڕێ نه‌نیاسى، ڤێجا ئه‌و ل به‌ر خۆ به‌رزه‌كرى، كو فه‌له‌نه، وهه‌چییێ دويكه‌فتنا ڕێكا وان كرى. ويا باشه بۆ خوانده‌ڤانى پشتى خواندنا فاتحێ بێژت: (آمين)، یه‌عنى: ئه‌ى خودا تو د به‌رسڤا مه وه‌ره، وئه‌و نه ئايه‌ته‌كه ژ سووره‌تێ، له‌و د قورئانێ دا نانڤيسن.