قورئانا پیرۆز › سورەتا الأنفال › ئایەتا ٤٦
سورەتا الأنفال · ئایەتا ٤٦ ب تەفسیرا کوردی
Al-Anfal
بِسۡمِ ٱللَّهِ ٱلرَّحۡمَٰنِ ٱلرَّحِيمِ
تەفسیرا ساناهی — ماموستا تەحسین ئیبراهیم دۆسکی · ژێدەر
وَإِذۡ يُرِيكُمُوهُمۡ إِذِ ٱلۡتَقَيۡتُمۡ فِيٓ أَعۡيُنِكُمۡ قَلِيلٗا وَيُقَلِّلُكُمۡ فِيٓ أَعۡيُنِهِمۡ لِيَقۡضِيَ ٱللَّهُ أَمۡرٗا كَانَ مَفۡعُولٗاۗ وَإِلَى ٱللَّهِ تُرۡجَعُ ٱلۡأُمُورُ ﴿٤٤﴾
وهوین ل بیرا خۆ بینن ده‌مێ دوژمن هاتينه مه‌يدانا شه‌ڕى، وهه‌وه ئه‌و كێم ديتین ڤێجا هوين ل سه‌ر شه‌ڕێ وان بسته بووین، وخودێ هوين د چاڤێن وان دا كێمكرن؛ دا ئه‌و باش خۆ بۆ شه‌ڕێ هه‌وه ئاماده نه‌كه‌ن؛ دا خودێ وى كارى پێك بينت يێ كو هه‌ر دا پێك ئێت، ڤێجا دا ئه‌و سۆز ب جهـ بێت يا خودێ دايه هه‌وه كو هوين دێ ب سه‌ركه‌ڤن، وپه‌يڤا خودێ بوو یا سه‌ركه‌فتى وپه‌يڤا كافران بنكه‌فت. ودويماهییا هه‌مى كاران بۆ نك خودێیه، ڤێجا ئه‌و دێ جزايێ هه‌ر ئێكى ده‌تێ.
يَـٰٓأَيُّهَا ٱلَّذِينَ ءَامَنُوٓاْ إِذَا لَقِيتُمۡ فِئَةٗ فَٱثۡبُتُواْ وَٱذۡكُرُواْ ٱللَّهَ كَثِيرٗا لَّعَلَّكُمۡ تُفۡلِحُونَ ﴿٤٥﴾
ئه‌ى ئه‌وێن باوه‌رى ب خودێ وپێغه‌مبه‌رێ وى ئيناى، وكار ب شریعه‌تێ وى كرى، ئه‌گه‌ر هوين هاتنه ڕاستا كۆمه‌كێ ژ وان كافرێن خۆ بۆ شه‌ڕێ هه‌وه ئاماده‌كرى، هوين خۆ ڕاگرن و ژ به‌ر وان نه‌ڕه‌ڤن، وهوين گه‌له‌ك خودێ ل بيرا خۆ بينن ودوعا ژێ بكه‌ن كو ئه‌و هه‌وه ب سه‌ر دوژمنى بێخت؛ دا به‌لكى هوين ب مراد بكه‌ڤن.
وَأَطِيعُواْ ٱللَّهَ وَرَسُولَهُۥ وَلَا تَنَٰزَعُواْ فَتَفۡشَلُواْ وَتَذۡهَبَ رِيحُكُمۡۖ وَٱصۡبِرُوٓاْۚ إِنَّ ٱللَّهَ مَعَ ٱلصَّـٰبِرِينَ ﴿٤٦﴾
وهوين د هه‌مى حالێن خۆ دا پێگيرییێ ب گوهدارییا خودێ وپيغه‌مبه‌رێ وى بكه‌ن، وهوين د ناڤبه‌را خۆ دا ب هه‌ڤڕكى نه‌چن دا گۆتنا هه‌وه ژێكڤه نه‌بت ودلێن هه‌وه ژێك دوير نه‌كه‌ڤن، ڤێجا هوين لاواز ببن وهێز وسه‌ركه‌فتنا هه‌وه نه‌مينت، وده‌مێ هوين دچنه به‌رانبه‌ر دوژمنى هوين دبێنفره‌هـ بن. هندى خودێیه ب هاريكارى وپشته‌ڤانییێ يێ د گه‌ل بێنفره‌هان، وئه‌و وان شه‌رمزار ناكه‌ت.
وَلَا تَكُونُواْ كَٱلَّذِينَ خَرَجُواْ مِن دِيَٰرِهِم بَطَرٗا وَرِئَآءَ ٱلنَّاسِ وَيَصُدُّونَ عَن سَبِيلِ ٱللَّهِۚ وَٱللَّهُ بِمَا يَعۡمَلُونَ مُحِيطٞ ﴿٤٧﴾
وهوين وه‌كى وان بوتپه‌رێسان نه‌بن يێن ب خۆمه‌زنكرن ڤه وبۆ ڕيمه‌تى ژ باژێرێ خۆ ده‌ركه‌فتين؛ دا ئه‌و نه‌هێلن خه‌لك بێنه د دينێ خودێ دا. وهندى خودێیه ب كارێ ئه‌و دكه‌ن يێ زانايه ووى دۆرا لێ گرتى چو تشته‌ك ل به‌ر وى به‌رزه نابت.
وَإِذۡ زَيَّنَ لَهُمُ ٱلشَّيۡطَٰنُ أَعۡمَٰلَهُمۡ وَقَالَ لَا غَالِبَ لَكُمُ ٱلۡيَوۡمَ مِنَ ٱلنَّاسِ وَإِنِّي جَارٞ لَّكُمۡۖ فَلَمَّا تَرَآءَتِ ٱلۡفِئَتَانِ نَكَصَ عَلَىٰ عَقِبَيۡهِ وَقَالَ إِنِّي بَرِيٓءٞ مِّنكُمۡ إِنِّيٓ أَرَىٰ مَا لَا تَرَوۡنَ إِنِّيٓ أَخَافُ ٱللَّهَۚ وَٱللَّهُ شَدِيدُ ٱلۡعِقَابِ ﴿٤٨﴾
وهوين ل بيرا خۆ بينن ده‌مێ شه‌يتانى بۆ بوتپه‌رێسان ئه‌و كار شرينكرى يێ ئه‌و ژ به‌ر هاتين وخۆ بۆ ئاماده‌كرى، ووى گۆته وان: ئه‌ڤرۆ كه‌سه‌ك نه‌شێته هه‌وه، وهندى ئه‌زم ئه‌ز پشته‌ڤانێ هه‌وه‌مه، ڤێجا ده‌مێ هه‌ردو ده‌سته‌ك گه‌هشتينه ئێك: بوتپه‌رێس وشه‌يتان د گه‌ل دا، وموسلمان وفريشته د گه‌ل دا، شه‌يتانى پشتا خۆ دا وان وزڤڕى، وگۆته بوتپه‌رێسان: هندى ئه‌زم ئه‌زێ ژ هه‌وه به‌ريمه، ئه‌زێ وى تشتى دبينم يێ هوين نابينن ژ هاتنا فريشته‌يان بۆ پشته‌ڤانییا موسلمانان، هندى ئه‌زم ئه‌ز ژ خودێ دترسم، ڤێجا وى ئه‌و شه‌رمزاركرن وخۆ ژ وان به‌رى كر. وخودێ يێ عه‌زاب دژواره بۆ وى يێ گوهدارییا وى نه‌كه‌ت و ب دورستى تۆبه نه‌كه‌ت.