قورئانا پیرۆز › سورەتا البقرة › ئایەتا ٣
سورەتا البقرة · ئایەتا ٣ ب تەفسیرا کوردی
Al-Baqarah
بِسۡمِ ٱللَّهِ ٱلرَّحۡمَٰنِ ٱلرَّحِيمِ
تەفسیرا ساناهی — ماموستا تەحسین ئیبراهیم دۆسکی · ژێدەر
الٓمٓ ﴿١﴾
(الم) ئه‌ڤ حه‌رفه ويێن وه‌كى وان ژ حه‌رفێن كه‌ركرى ل سه‌رێن سووره‌تان، خودێ دزانت كانێ وى چ مراد پـێ هه‌يه، وئيشاره‌ته‌ك بۆ ئعجازا قورئانێ تێدا هه‌يه؛ چونكى قه‌بخوازییا بوتپه‌رێسان یا پـێ هاتییه‌كرن، وئه‌و نه‌شيان به‌رسڤێ بده‌ن، وئه‌و قورئان يا پێكهاتییه ژ وان حه‌رفێن زمانێ عه‌ره‌بان ژێ پێك دئێت. ڤێجا نـه‌شيانا عه‌ره‌بان كو قورئانه‌كا وه‌كى وێ بينن -هه‌ر چه‌نده ب ده‌ڤ وئه‌زمانترين وڕه‌هوانترين مرۆڤ ئه‌ون- نيشانا هندێ يه كو قورئان ژ لايێ خودێ ڤه هاتییه، وئه‌و نه ژ نك موحه‌ممه‌دى يه سلاڤ لێ بن.
ذَٰلِكَ ٱلۡكِتَٰبُ لَا رَيۡبَۛ فِيهِۛ هُدٗى لِّلۡمُتَّقِينَ ﴿٢﴾
ئه‌ڤ قورئانه‌يه كيتابا مه‌زن يا چو گومان تێدا نه كو ئه‌و ژ لايێ خودايى ڤه هاتییه، ڤێجا دورست نینه كه‌سه‌ك تێدا بكه‌ڤته گومانێ ژ به‌ر كو ئه‌و یا ئاشكه‌رایه، ته‌قوادار ب زانینا مفادار وكارێ چاك مفايى بۆ خۆ ژێ دبينن، وئه‌ون یێن ژ خودێ دترسن ودويچوونا ئه‌حكامێن وێ دكه‌ن.
ٱلَّذِينَ يُؤۡمِنُونَ بِٱلۡغَيۡبِ وَيُقِيمُونَ ٱلصَّلَوٰةَ وَمِمَّا رَزَقۡنَٰهُمۡ يُنفِقُونَ ﴿٣﴾
وئه‌و ته‌قوادار ئه‌ون يێن باوه‌رییێ ب وى تشتێ نه‌به‌رچاڤ دئينن يێ كو ئه‌و ب هه‌ست وعه‌قلێ خۆ ب تنێ ناگه‌هنێ، چونكى ئه‌و ب وه‌حییێ ب تنێ دئێته زانين ئه‌و وه‌حییا خودێ بۆ پێغه‌مبه‌رێن خۆ دهنێرت، وه‌كى: باوه‌رییا ب فريشته، وبه‌حه‌شت، وئاگرى، وتشتێن دى يێن خودێ یان پێغه‌مبه‌رێ وى سلاڤ لێ بن گۆتى. (وباوه‌رى په‌یڤه‌كا كۆمكه‌ره بۆ هندێ مرۆڤ هه‌بوونا خودێ وملیاكه‌ت و كیتاب و پێغه‌مبه‌ر وڕۆژا دویماهییێ وقه‌ده‌رێ باشى و خرابییا وێ، ب گۆتن وكریار بنه‌جهـ بكه‌ت، ب دلى وئه‌زمانى وئه‌ندامێن له‌شى) وئه‌و ته‌قوادار د گه‌ل باوه‌ری ئینانا ب تشتێ نه‌به‌رچاڤ، ل سه‌ركرنا نڤێژێ ب ڕه‌نگه‌كێ دورست و ل ده‌مێ وێ دمجدن، ل دويڤ شريعه‌تێ خودێ بۆ پێغه‌مبه‌رێ خۆ سلاڤ لێ بن دانايى، وئه‌و ژ وى مالێ مه دايێ زه‌كاتێ وخێران دده‌ن.
وَٱلَّذِينَ يُؤۡمِنُونَ بِمَآ أُنزِلَ إِلَيۡكَ وَمَآ أُنزِلَ مِن قَبۡلِكَ وَبِٱلۡأٓخِرَةِ هُمۡ يُوقِنُونَ ﴿٤﴾
وئه‌وێن باوه‌رییێ ب وێ دئينن يا كو بۆ ته ئه‌ى پێغه‌مبه‌ر ژ قورئانێ هاتییه خوارێ، و ب وێ سوننه‌تێ ژى يا بۆ ته هاتییه خوارێ، و ب وێ ژى يا به‌رى ته بۆ پێغه‌مبه‌ران هاتییه خوارێ ژ كيتابان وه‌كى: ته‌وراتێ وئنجيلێ وكیتابێن دى، وئه‌و باوه‌رییه‌كا باوه‌رى ب ژينا پشتى مرنێ دئينن، و ب وێ حسێب وجزادانێ یا كو تێدا هه‌ى. باوه‌رییه‌كا ب دلى یا وه‌سا كو ل سه‌ر ئه‌زمان و ئه‌ندامێن له‌شى ئاشكه‌را ببت. وتايبه‌ت به‌حسێ ڕۆژا دويماهییێ هاته‌كرن؛ چونكى باوه‌رییا ب وێ ڕۆژێ مه‌زنترين پالده‌ره بۆ كرنا چاكییان، وخۆدويركرنا ژ حه‌رامییان، وحسێبا د گه‌ل نه‌فسێ.
أُوْلَـٰٓئِكَ عَلَىٰ هُدٗى مِّن رَّبِّهِمۡۖ وَأُوْلَـٰٓئِكَ هُمُ ٱلۡمُفۡلِحُونَ ﴿٥﴾
خودانێن ڤان سالۆخه‌تان ب هاریكارى و ته‌وفیقا ئافرانده‌رێ خۆ ل سه‌ر ڕۆناهییه‌كێنه ژ خودايێ خۆ، وئه‌ون يێن سه‌ركه‌فتى، يێن كو ئه‌و ب ده‌ست خۆ ڤه ئينايى يا وان خواستى، و ژ وێ خرابییێ ڕزگار بووين يا ئه‌و ژێ ڕه‌ڤين.