قورئانا پیرۆز › سورەتا الرعد › ئایەتا ١٤
سورەتا الرعد · ئایەتا ١٤ ب تەفسیرا کوردی
Ar-Ra'd
بِسۡمِ ٱللَّهِ ٱلرَّحۡمَٰنِ ٱلرَّحِيمِ
تەفسیرا ساناهی — ماموستا تەحسین ئیبراهیم دۆسکی · ژێدەر
هُوَ ٱلَّذِي يُرِيكُمُ ٱلۡبَرۡقَ خَوۡفٗا وَطَمَعٗا وَيُنشِئُ ٱلسَّحَابَ ٱلثِّقَالَ ﴿١٢﴾
وئه‌وه يێ ژ نيشانێن خۆ برويسییێ نيشا هه‌وه دده‌ت، ڤێجا هوين دترسن كو ئاگره‌ك ژێ ب سه‌ر هه‌وه دا بێت هه‌وه بسۆژت، وهوین دلێ خۆ دبه‌نه هندێ كو باران بۆ هه‌وه ژێ بێت، و ب شيانا وى عه‌ورێن ب ئاڤه‌كا بۆش دگران بۆ مفايێ هه‌وه چێ دبن.
وَيُسَبِّحُ ٱلرَّعۡدُ بِحَمۡدِهِۦ وَٱلۡمَلَـٰٓئِكَةُ مِنۡ خِيفَتِهِۦ وَيُرۡسِلُ ٱلصَّوَٰعِقَ فَيُصِيبُ بِهَا مَن يَشَآءُ وَهُمۡ يُجَٰدِلُونَ فِي ٱللَّهِ وَهُوَ شَدِيدُ ٱلۡمِحَالِ ﴿١٣﴾
وتۆپ وبرويسى ب سوپاسییا خودێ ته‌سبيحا وى دكه‌ن ته‌سبيحه‌كا هندێ دگه‌هينت كو ئه‌و بن ده‌ستى وينه، وملیاكه‌ت ژ ترسا خودێ دا وى پاك وپيرۆز دكه‌ن، وخودێ برويسییان دهنێرت ڤێجا وى پێ تێ دبه‌ت يێ وى بڤێت ژ به‌نییێن خۆ، وكافر هه‌ڤڕكییێ د ده‌رحه‌قا سالۆخه‌ت وشيانا خودێ دا ل سه‌ر ڕاكرنا پشتى مرنێ دكه‌ن، وئه‌و يێ هێز وشيان وگرتن دژواره بۆ وى يێ گوهدارییا وى نه‌كه‌ت.
لَهُۥ دَعۡوَةُ ٱلۡحَقِّۚ وَٱلَّذِينَ يَدۡعُونَ مِن دُونِهِۦ لَا يَسۡتَجِيبُونَ لَهُم بِشَيۡءٍ إِلَّا كَبَٰسِطِ كَفَّيۡهِ إِلَى ٱلۡمَآءِ لِيَبۡلُغَ فَاهُ وَمَا هُوَ بِبَٰلِغِهِۦۚ وَمَا دُعَآءُ ٱلۡكَٰفِرِينَ إِلَّا فِي ضَلَٰلٖ ﴿١٤﴾
گازییا ته‌وحيدێ (لا إله إلا الله) بۆ خودێ ب تنێیه، دوعا وپه‌رستن ژ وى ب تنێ دئێته‌كرن، وئه‌و خوداوه‌ندێن ئه‌و ژبلی خودێ گازى دكه‌نێ به‌رسڤا وان يێن گازى دكه‌نێ ناده‌ن، وحالێ وان د گه‌ل خوداوه‌ندێن وان وه‌كى حالێ وى مرۆڤێ تێهنییه يێ ژ دوير ڤه ده‌ستێ خۆ بۆ ئاڤێ درێژ بكه‌ت؛ دا وێ بگه‌هينته ده‌ڤێ خۆ به‌لێ ئه‌و ناگه‌هتێ، وداخوازا كافران ژ وان خوداوه‌ندان گه‌له‌ك ژ ڕاستییێ يا دويره چونكى ئه‌و شريكان بۆ خودێ چێ دكه‌ن.
وَلِلَّهِۤ يَسۡجُدُۤ مَن فِي ٱلسَّمَٰوَٰتِ وَٱلۡأَرۡضِ طَوۡعٗا وَكَرۡهٗا وَظِلَٰلُهُم بِٱلۡغُدُوِّ وَٱلۡأٓصَالِ۩ ﴿١٥﴾
وهه‌ر تشته‌كێ ل عه‌سمانان وعه‌ردى خۆ بۆ خودێ دچه‌مینت و خۆ ب ده‌ست وى ڤه به‌ردده‌ت، ڤێجا خودان باوه‌ر ژ دل خۆ بۆ وى دچه‌مينن، وكافر ب كوته‌كى وێ چه‌ندێ دكه‌ن؛ چونكى ئه‌و خۆ ژ عه‌بدينییا خودێ بلندتر دبينن، وخوڕستییا وان وان دره‌وين ده‌رتێخت، وسيبه‌را چێكرییان خۆ ب ده‌ست وى ڤه به‌ردده‌ت، وئه‌و ب فه‌رمانا وى ل سپێده وئێڤاران دلڤلڤت.
قُلۡ مَن رَّبُّ ٱلسَّمَٰوَٰتِ وَٱلۡأَرۡضِ قُلِ ٱللَّهُۚ قُلۡ أَفَٱتَّخَذۡتُم مِّن دُونِهِۦٓ أَوۡلِيَآءَ لَا يَمۡلِكُونَ لِأَنفُسِهِمۡ نَفۡعٗا وَلَا ضَرّٗاۚ قُلۡ هَلۡ يَسۡتَوِي ٱلۡأَعۡمَىٰ وَٱلۡبَصِيرُ أَمۡ هَلۡ تَسۡتَوِي ٱلظُّلُمَٰتُ وَٱلنُّورُۗ أَمۡ جَعَلُواْ لِلَّهِ شُرَكَآءَ خَلَقُواْ كَخَلۡقِهِۦ فَتَشَٰبَهَ ٱلۡخَلۡقُ عَلَيۡهِمۡۚ قُلِ ٱللَّهُ خَٰلِقُ كُلِّ شَيۡءٖ وَهُوَ ٱلۡوَٰحِدُ ٱلۡقَهَّـٰرُ ﴿١٦﴾
تو -ئه‌ى پێغه‌مبه‌ر- بێژه بوتپه‌رێسان: كییه ئافرانده‌رێ عه‌سمانان وعه‌ردى وڕێڤه‌به‌رێ وان؟ تو بێژه: خودێیه، پاشى ژ بۆ نه‌هێلانا چو هێجه‌تان بۆ وان تو بێژه: ئه‌رێ هه‌وه -ژبلی وى- هنده‌ك خودايێن دى بۆ خۆ گرتينه، وئه‌و نه‌شێن چو مفایى يان زيانێ بگه‌هيننه خۆ حه‌تا بگه‌هيننه هه‌وه، وهه‌وه په‌رستنا خودايێ وان هێلايه؟ تو بێژه وان: ئه‌رێ ما ل نك هه‌وه مرۆڤێ كافر -ئه‌ڤێ وه‌كى كۆره‌ى- ويێ خودان باوه‌ر -كو وه‌كى يێ ب چاڤه- وه‌كى ئێكن؟ يان ل نك هه‌وه كوفر -كو وه‌كى تارییانه- وباوه‌رى -كو ڕۆناهییه- وه‌كى ئێكن؟ يان ئه‌و خودايێن وان بۆ خودێ كرينه هه‌ڤپشك ئافراندنه‌كا وه‌كى يا خودێ دكه‌ن، ڤێجا ئافراندنا وان هه‌ڤپشكان ل به‌ر وان تێكه‌لی ئافراندنا خودێ بوويه، ڤێجا وان هزركرییه كو ئه‌و خوداوه‌ند ژى هێژاى په‌رستنێنه؟ تو بێژه وان: خودێیه ئافرانده‌رێ هه‌مى تشتان ژ چوننه‌يێ، وئه‌و ب تنێیه يێ هێژاى په‌رستنێ، وئه‌وه ئێكێ ب سه‌رڤه‌هاتى يێ هێژاى خوداينی وپه‌رستنێ، نه كو ئه‌و صه‌نه‌مێن نه چو زیانێ نه چو مفایى نه‌گه‌هینن.